Rano je letnje jutro, sunca još ni, jutarnji zgon još ni zazgonil, ni petehi se još nisu uglasili, Pasjak spi. Gospodar ut hiše, lovac Jive se je stal i potiho šal u staru hišu po pušku. Brek mu uvi put ne rabi pa ga je sinoć zaprl u jugno da ne njeri, ač bi i on rada šal žnjin u goru. Seglih, kada je pasal poli jugna, je zacvilil, ne moreš kucota  prevarit, to je pametno blago.

          Jive gre tamo priko Batice jame i zgora Rijavih Ramontin, morda upleni kakovega rogatega svata, srnjaka. Gre ubać njive Za Golac, zdola Brc, blizu Paškega studenca. Tote, zgora Brusna, prihaja divje blago na pašu.

Rosa mu je već zmočila noge se do kolen. Ustavil se je i ubrnil proti Šapljanski gradini i na vrh zagledal jedan blisk, morda samo jenu jiskru. Za ku minutu će se hiljade traki razlit po dolini zdola njega. Nebeški kralj Sunce će pokazat soje blišćeće lice.

          Z dolinčice je zakričala šojka. To ga je ustavilo, je posluhnil i napeto tapal naprit po stazi, se sprignil i skoro po prstih šal dalje, pazeć da ne stane na kakovu suhalicu. Livo ud njega je zažuboril potočić, ne uni pravi, to je bila voda ud studenca. Čera je pal daš, je storilo kodabi jenu plohu, a višak vode se je zlival priko staze i žuboril.

Jive je namislil  počekat na mesto kadi staza zavije h dolini. U dolinu je još škurava, pred njin ograd, zid zidan zas kamikon, priko zida leske i njive. Čistina je pa su svitle. Jive se je posel na zid. Doklje je čekal zmislil se je sojih mladih dani - kot utrok ud šest let je šal za volara, je gnal goveda na pašu, se tamo u Kute i Paradine, za Presiku do Žijanskih parti. Zmislil se je kako su on i prijateli Gržan, Srdić, Neška, Škulja, Jakočin i drugi jigrali " na kozu  ", zas lipičove kore delali trubente i fićkalice, pa fićkali i tulili po selu doklje su Rijavka, Mora, Hiljac, Lis, Jelen i druga goveda zgonila hodeć korajžno doma. 

          Tako zamišljenemu do ušes mu je prišlo niča kot da prelomiš mokru suhalicu. Zas palcon je porinil klabuk na nazat da bolje čuje, da mu ušesa primu najmanji šušanj, malo je ubrnil glavu nadesno - vidit ni nič, pa malo na livo i ga je zagledal. Najedanput, znenada, kako da je zas same zemlje zrasal, se je pokazal žut, žućkast, crljenkast, ali kako već - srnjak. Trava je visoka pa te znenadi kada ga unako naglo zagledaš. Jimil je lipe, velike roge, po tri manje rožiće na saku stran, bliže glavi kako pošpricano puno brdovic, šesterac kako reču. Pásal je, utkidal rožican vršiće, ma nemirno, sako malo je zdignil glavu, jil dalje, posluhnil, pa opet jil. 

          Udzdola, čaz rebre i jarke je bilo čut cuh kako lize po štriki,  prvo Fontane i Galerije je zafićkal i Jivetu je srnjak zniknil, ni ga već bilo vidit. Bil je jezan, ač su mu ga skrile leske, a užival je gledat lipotu živali, z rogi u viške, to blago teško okoli 18-20 kil. Nu, na slavu boga, ča je je, morda ča drugo pride na karunu.

          Misli su mu same hodile po selih, plesih, upasilih, vrtnih veselicah - Vinkušti u Brce, Miholje u Pasjak, Paulova u Starod. Na Paulovu je snih, a sada pred lovcon Jiveton zelena karuna, margarite, rožice i trave sih sort.

            Nadesno je zakričala šojka, druga njoj je udgovorila kre - kre, ki hipić kašnje još jedanput se je pokazal uni jisti srnjak. Glavu je držal fanj sprignjenu, to će reć da je star.

           Saki put kada zagleda to čudeso lipote, moći, naglosti i plahosti, mira i nemira, čudeso naráve, Jivetu zajigra lovačko srce. Pustil ga je da dene glavu doli, da brsti i se zabavi zas jidaču. Kada je zdignil glavu mu je ubrnil bok i Jive je spružil. Zas puške je zletil mičkin uganj, srnjak se je zrušil, šojke zamuknile, a udmev u jarke, h Gradini pa nazat storil je dva pute bum, buuuum.

          Zduga, priko u Slovensko se je čulo ba - ba - bauu - bauu. Jive je znal da Brdan Franc ni jimil lovačke sriće kako on. Paščan Jive je bil poznat kot dobar šicar, je pa boh.

          Doma je jimil šestoru dicu, manju i veću. Tega puta ćeju on i susedi razdélit kus pleć, rebár ali kosti za juhu. U nedilju će se moć storit pečenka pa će bit već veselja u hišu.

Leto za leton se je tako gospodar brigal za familiju doklje se dica nisu poženila, jeni ušli u svit, drugi šli delat u druge kraje, Riku ali Ljubljanu u poduzeća. Razveselili su ga sakiput kada su prišli i dopeljali pokazat mu unuke, njigovu žlahtu, krv i lase i škuljice na ubras, kako on.

          Postaral se je ma lovit ga je vuklo, smiron. Zadnja leta kumpaniju mu je delala kučkica Bistra, škuro kafena brak - jazbačarka z lipimi kafetnastimi oči. Kada je bila pala u školj, u panór, pet dan je je zas sojin braton jiskal u Sinakoše, Žlabovice, Farušćine, posud kuda je lovila. Našli su je brižnu, ščrpanu na dno jame. 

     Donesal je je u rucak doma, on i žena davali su njoj mliko na slamicu, pomalo, pa zmašćenu hranu kot utroku, već puti na dan. Ćedan dan brižno blašce je prihajalo na se doklje ni jilo po navadi.

Prišla je zima. Puhalo je kot si hudići. Blizu vrha Buričine, Jive i prijateli su lovili divje prasce. Pet lovci je šlo na štant, tri z brekon poganjat. Sel je na dno jene debele bukve, u zamičje, kadi manje puše, zdola njega rebre. Jutro ni davalo na nič posebnega, lovci su okoli havkali, breke pa ni bilo čut.

          Zdola, okoli smrikvic u dolinčicu je zašušnjalo. Jivetu su se napetnila ušesa, potegnil je h sebi petešiće na pušku. Nutra su bili nalivo baletoni, nadesno idealka.

Pred sobu na jeno dvajset koraki je zagledal njega, samčinu, divjega prasca velikega kako manji junac.Takov je zgledal, ač su mu šćetine bile se zdignjene, nahrhurene. Lovci su ga poznali ma nisu ga nikad uplenili.

Samac se je naglo ustavil, morda da posluhne utkud je čut une ki ga preganjaju. Zgledalo je kako da miriju jedan drugega, Jive njega priko puške. Jedan nasproti drugega - star Jive lovčina, star prasac, samčina.

          Tega puta starega lovca je znutra niča ujilo, zaparalo mu se je da sebi nasproti gleda takovega kot je on, da gleda sebe. Morda par sekundic mu je pred oči pr′letilo so življenje, lipo i grdo, lačno, nikad presito, žejno, trizno i pijano, potno, muka i veselje, dica ća i dica tote. Zaparalo mu se je da su i prascu šćetine ratale nikako veće, da je i on miran i nemiran isti hip. Još niča - kot da je čul da se glasi kako uni Mrko u prkat poli jugna. Kako da blago zastupi ča stari lovac grunta.

          Zduga, kada je brek prišal na dih ud blaga, je na kratko, visoko zvrisnil "av ". Jive ti put, jedini put u soje življenje, je storil jedanput ud manje, je spustil pušku. 

Orlando zas Pasjaka©Sva prava pridržana